भारतवर्षामध्ये अनादी कालापासून उच्चकोटीच्या संतांची परंपरा सुरू आहे. संत ज्ञानेश्वर महाराज, जगद्गुरु संत तुकाराम महाराज, संत रामदास स्वामी, रामकृष्ण परमहंस, स्वामी विवेकानंद यांच्यासारखे अनेक थोर संत या देशात होऊन गेले. दत्त संप्रदायात परमपूज्य टेम्बेस्वामी महाराज यांनी देशभर पायी भ्रमण करीत या संप्रदायाचा मोठा विस्तार करीत सामान्य माणसांची दुःख दूर करण्यासाठी’ दिगंबरा दिगंबरा श्रीपाद वल्लभ दिगंबरा’ या महामंत्राची निर्मिती केली आणि भक्ती, ज्ञान आणि योग याचा प्रसार केला. तीच परंपरा पुढे परमपूज्य योगीराज श्रीगुळवणी महाराजांनी चालवली त्यानंतर प. पू. ब्रह्मश्री दत्तमहाराज कवीश्वर यांनी समर्थपणे चालवली. आता जालना येथील दत्ताश्रमाची निर्मिती करीत येथून प. पू. भगवतीस्वरूप ताईमहाराज ही परंपरा चालवत आहेत. परमपूज्य दत्तमहाराज हे वेदांत शास्त्रातील फार मोठे अधिकारी सतपुरुष होऊन गेले. त्यांचे प्रेरणादायी जीवनचरित्र तरुण पिढीला माहित व्हावे हा या वेबसाईटचा हेतू आहे.